Toegang tot die Spesiale Vrywillige Blootleggingsprogram (SVBP) het einde Augustus 2017 gesluit en die regering het sowat R1 biljoen gedra. Daar was twee duisend aansoeke vir hierdie amnestie. Alhoewel dit nie die finale bedrag is nie, aangesien SVBP aansoeke steeds verwerk word, is daar min twyfel dat die Nasionale Tesourie meer inkomste gaan moet genereer. Die Davis Belastingkomitee het byvoorbeeld hierdie amnestie voorgestel en verwag dat die Fiscus tot R10 biljoen sal insamel.
Belastingkenners het die teleurstellende resultate aan die kompleksiteit van die aansoekvorm toegeskryf (gedetailleerde dokumentasie is deur die SAID en die Reserwebank vereis) en die feit dat indien kliënte besluit het om nie van die SVBP gebruik te maak nie, was hulle rekenmeesters verplig om die owerhede in kennis te stel. Dit wil ook voorkom asof gesprekke rondom ‘n belastingopstand momentum kan versamel, wat beteken dat individue hul opsies opweeg.
Die SVBP is voorgestel as die finale geleentheid vir belastingbetalers om hul sake bloot te lê ten opsigte van onverklaarde buitelandse bates en inkomste. Vanaf September 2017 het die outomatiese uitruil van inligting, tussen inkomste owerhede van meer as sewentig lande, begin en word verwag om nie-nakoming op ‘n ongekende wêreldwye skaal te ontbloot. Die SAID sal vermoedelik ook hulle aandag fokus op gevalle soortgelyk aan die “Panama Papers” -lekkasies wat ook toenemend plaasvind.